Në kuadrin e Festave të Nëntorit Shoqata “Scanderbeg” në Parma organizoi një sërë aktivitetesh kulturore dhe artistike në përkujtim të këtyre ngjarjeve të shënuara në historinë e popullit tonë.
Me datë 26 Nëntor kjo Shoqatë organizoi një mbrëmje festive me pjesëmarrjen e shumë bashkëatdhetarëve që jetojnë në këtë zonë dhe rrethinat e saj si dhe përfaqësues të shoqatave të tjera.
Të pranishëm në këtë mbrëmje ishin edhe zv/ministri i Punëve të Jashtme të Italisë, z. Mario Giro, Kryetari i Bashkisë së Parmës, z. Federico Pizzarotti, Senatori Giorgo Pagliari si dhe miq të tjerë italianë.
Aktiviteti u ndoq gjithashtu nga Konsullja e Përgjithshme në Milano, znj. Anila Pojani dhe konsullja znj. Sadije Xheko.
Zv/ministri Giro dhe Kryetari i Bashkisë së Parmës shprehën urimet e tyre për këtë ditë të shënuar në historinë e popullit tonë dhe vunë në dukje nivelin shumë të mirë të marrëdhënieve ndërmjet dy vendeve tona si dhe vlerësuan kontributin e komunitetit shqiptar në jetën ekonomiko-kulturore dhe sociale të vendit.
Në fjalën e saj Konsullja e Përgjithshme, znj. Pojani përgëzoi organizatorët për aktivitetet e shumta që kjo Shoqatë ka zhvilluar, duke filluar nga data 12 Nëntor të cilat vazhdojnë deri më datën 02 dhjetor. Më tej znj. Pojani shprehu urimet e saj për Festat e Nëntorit për të gjithë shqiptarët kudo që janë. Kjo ditë e shënuar për të gjithë ne ka qenë dhe mbetet simbol i bashkimit, unitetit, lidhjes, krenarisë, qëndresës dhe vendosmërisë së popullit shqiptarë. Kjo është një ndër ditët më të ndritshme dhe ndër më të rëndësishmet të rilindjes sonë kombëtare, në gjithë historinë tonë. Ndaj edhe me shumë të drejtë, të gjithë shqiptarët e të gjitha trojeve, e festojnë me krenari 28 Nëntorin, Festën e Pavarësisë si Ditëlindjen e kombit, këtë ditë të nderimit dhe mirënjohjes së pakufishme ndaj të gjithë atyre që bën gjithçka mundën për kombin, për arritjen e lirisë dhe pavarësisë që sot e gëzojmë, tha znj Pojani.
E gjithë mbrëmja u shoqërua me këngë dhe valle tradicionale shqiptare, ku një vend të veçantë zunë interpretimet e grupit të valleve “Danza Scanderbeg” që ekzekutoi me mjeshtëri valle nga krahina të ndryshme shqiptare.
Mbrëmja kaloi në një atmosferë të gëzueshme festive.
Gjithashtu me datë 27 Nëntor, Shoqata “Sofra shqiptare” në Lecco zhvilloi një drekë festive për të përkujtuar dhe festuar me bashkëatdhetarët ditën e 104 vjetorit të ngritjes së Flamurit, me pjesëmarrjen e shumë familjeve shqiptare që jetojnë në këtë zonë dhe rrethinat e saj.
Aktiviteti kaloi ne nje atmosferë të gëzuar shoqëruar nga tingujt e këngëve dhe valleve të krahinave të ndryshme shqiptare.
Një vend të veçantë në këtë aktivitet zunë fëmijët e shkollës shqipe të kësaj zone, të cilët megjithëse kanë lindur dhe janë rritur jashtë atdheut, recituan vargje nga letërsia shqipe kushtuar kësaj ngjarje të veçantë në historinë e popullit tonë.
Në aktivitet ishte i pranishëm kryetari i Bashkisë së Leccos, z. Virginio Brivio, përfaqësues të shoqatave të tjera si dhe Konsullja e Përgjithshme në Milano, znj. Anila Pojani dhe konsullja, znj. Sadije Xheko.
